Bil milli hugsana og athafna

Einn streituvaldur sem fáir taka eftir er bilið sem myndast milli hugsana og athafna. Því meira bil sem er á milli þess sem manneskja hugsar, segir og gerir, því meiri verður streitan. Í öllum menningarsamfélögum er það litið hornauga þegar mikið bil myndast á milli þess sem manneskja segir og gerir. Slíkt ósamræmi (í daglegu tali nefnt lygar eða að lofa upp í ermina á sér) fer ekki aðeins í taugarnar á þeim sem fyrir því verða, heldur einnig þeim sem skapar ósamræmið. Hver manneskja er sinn eigin versti og harðasti dómari. Því meira bil sem er á milli þess sem hún hugsar og þess sem hún gerir, því meiri streita. Manneskja sem hugsar: „Ég verð að fara að hreyfa mig,“ en gerir það ekki er óafvitandi að skapa streitu í eigin lífi. Þar af leiðandi getur verið streitulosandi að iðka heilindi í öllum samskiptum við sjálfan sig og aðra, þ.e minnka bilið milli hugsana, orða og athafna, með því að standa við það sem maður hugsar og/eða draga úr óraunhæfum væntingum.

Úr bókinni „Þú ert það sem þú hugsar“ eftir Guðjón Bergmann, hægt er að panta bókina hér með því að senda okkur pöntun á min@velgengni.is.  Verð til notenda velgengni.is er einungis 1.890 kr.